Mattilsynet gir kosthaldsråd på bakgrunn av risikovurderingar. Foster og spedbarn er mest kjenslevare for dioksin og PCB.

• Barn, kvinner i fruktbar alder og gravide bør ikkje ete fiskelever eller pålegg laga av fiskelever, til dømes Svolverpostei og Lofotpostei.
• Andre grupper i befolkninga bør avgrense inntaket av fiskelever og pålegg laga av fiskelever.
• Konsum av fiskelever frå spesielt forureina hamner og fjordar og ferskvatn er ikkje tilrådeleg.

Tran er ein fiskeolje som er laga av lever av torsk, sei og hyse. Produksjonen av tran skjer i fleire trinn, og i prosessen vert miljøgifter reinsa vekk.

Sidan både PCB og dioksin har lang halveringstid i kroppen (fleire år) er det inntak over tid som betyr noko, ikkje kva ein et i korte periodar av livet.